臥薪嘗膽
通用資料
[編輯]現代寫法
[編輯]含義
[編輯]成語，形容人刻苦自勵、發奮圖強。
典故最初來自春秋時期。公元前496年，吳王闔閭（粵拼：hap6 lui5）出兵攻打越國，但係被越國擊敗，自己亦都戰死沙場。兩年之後，闔閭個仔夫差（粵拼：fu4 caai1）率兵擊敗越國，將越王勾踐（或作「句踐」，讀音一樣）押咗去吳國做奴隸。勾踐服侍夫差三年，做最低賤嘅工作，傳聞甚至舐過夫差嘅屎。三年之後，夫差消除咗對勾踐嘅戒心，俾佢返去越國。其實勾踐根本冇放棄復仇嘅計劃，暗中訓練精兵，強政勵治，等待時機反擊吳國。勾踐怕自己會貪圖眼前嘅安逸，消磨報仇雪恥嘅意志，所以佢為自己安排艱苦嘅生活環境。佢夜晚瞓覺唔瞓褥，淨係瞓柴草（薪）；又喺屋入面掛咗隻苦膽，週不時會舐下隻苦膽，提醒自己以前嘅恥辱。其他重有：
- 勾踐要求王宮嘅門衛喺佢每次出宮門嘅時候大聲問佢：「你重記唔記得以前嘅恥辱啊？！」
- 勾踐為咗鼓勵民眾，同王后、人民一齊參與勞動，同越人同心協力令到越國強大起來。
公元前473年，勾踐終於攻陷吳國國都姑蘇（今日嘅蘇州）。吳王夫差被勾踐流放，最後自殺身亡。
需要注意嘅係，喺最早關於勾踐發奮圖強嘅記載，司馬遷嘅《史記∙越王句踐世家》裡面，淨係話勾踐「嘗膽」，無話佢「臥薪」。原文係：「吳既赦越，越王句踐反國，乃苦身焦思，置膽於坐，坐臥即仰膽，飲食亦嘗膽也。」最先將「臥薪」同「嘗膽」擺埋一齊嘅，係北宋蘇軾嘅《擬孫權答曹操書》：「仆受遺以來，臥薪嘗膽，悼日月之逾邁，而嘆功名之不立。」
李敖認為：浙江紹興古城西北迎恩門出面嘅箭樓，就係越王勾踐臥薪嘗膽嘅地方。